من ثلاث مية سنه متجذره حره أبيه

يا مرابي نجد ما للشاعر بدونك قضيّه
سيّريني يا مرابي نجد حتى ابلغ مرادي
انتي ارض معلقات الشعر وارضٍ شاعريّه
فيك ترديد القصيد وفيك توحيد المبادي
وفيك قبر اللي تعزوا من على قب العبيه
عقب ما صافح زعامات الجزيره بالهنادي
من صغر سنه طموحه جاوز حدود الثريّه
ما يشوف الا الرياض ولا يقول الا بلادي
في يمينه سيفٍ أمضى حد وبصدره وصيه
ومن وراه الجيش ويساره من الشعّار حادي
صبح العارض ولف عقال رجلين المطيه
وصاح في حكمه وقال اليوم يا منادي تنادي
الحكمْ لله وفي شرعه وفي سنة نبيه
وفالسيوف اللي تحتها راحت رقبة المعادي
صانها الله فالزحازيح الرجال الصيرمية
واحتموا ما صانه الله فالصباح وفالهجادي
لين ورثها معزي للرجال الفيصليه
سبعةٍ ولكل واحد منهم موقف سيادي
من ثلاث مية سنه متجذره حره أبيه
ثقفتنا بالصمود وعلمتنا بالمهادي