من قمة لقمة لقمة جديدة

عامٍ ورى عامٍ وعامٍ ورى عام
من قمه لقمه لقمه جديده
خضرا شوارعنا ترفرف بالاعلام
ويعكس سمانا مناسبتنا السعيده
ياعزنا ياعيدنا بْكل الايام
يادارنا وأيام عيدك مديده
ياكم دوله راحت تراب وحْطام
وانتي بْثباتك يابلادي وحيده
رمز التقدم والمضي دوم قدام
ياوجهة العالم برؤيه جديده
يادرعنا ذخر العروبه والاسلام
ماهان من أنتي سندْه ورصيده
وحدك أبوتركي على الخيل وحْسام
وخلّا شتات الشعب كلّه بديده
عقب الفقر والخوف نرفل بالانعام
أمن ورفاهيّه وعيشه رغيده
واللي نعيشه واقع لغيرنا أحلام
بقيادة عياله رؤانا بعيده
يقودنا نحو القمم خير مقدام
مقدم هل العوجا محمد حفيده
القائد الملهم محطّم للأرقام
وحنا معه باللي يراه ويريده
فينا سكنتي يوم نسكن بك خْيام
بصحرا الهلاك اللي علينا شديده
غلاك يروينا لو كبودنا حْيام
جنّه سمومك والحياه الزهيده
ياما ردعنا عنك عربٍ وأعجام
عن غالي تْرابك وطاهر صعيده
لاما نطاوع فيك جاحد ولوّام
واللي نواك بسوّ حنّا نبيده
وقفاتنا ماكوده بفعل واختام
وبصماتنا من فوق أرضك شهيده
وعامٍ ورى عامٍ وعامٍ ورى عام
من قمه لقمه لقمه جديده
*** *** ***
*** *** ***
عوض سلامة العنزي