عد ما ذعذع نسيم وعد ما هبت هبايب وعد ما تشرق شموس المجد في نجد العذيه وعد ما تنبت فياض الأرض من ويل السحايب وعد ما ناحت على جرد الغصون الراعبيه يا هلا بك يا قصيدٍ صيغت حروفه ذهايب من عزيزٍ في عزيزٍ وجهته للعاذريه من ولد تركي تبدت شيخة تحيي الرغايب مهرةٍ للشعر ميلافٍ سعودٍ فيصليه من بعدها يا قصيدي كف عن زود الزرايب وانحت القيفان وإلا هيه لا تقبل عليّه شرق بها وغرب بها سوقها سوق الحرايب وانحر اللي للقصايد في تواصيفه شهيه من نسل تاج الملوك وصلب فكاك النشايب خادم البيتين نصر الدين وسهوم المنيه الفهد فهد العروبة والأصالة والنسايب الزعيم اللي فلا به مشبهه وألا حليه والعمام سعودها وأسودها عند النوايب ماخذ منهم شموخ وسطوة مع مقدريه من ولي العهد عبد الله خذا خفض الجنايب والشفافية وصدق القول وعزوم قويه ومن نديم الجود سلطان الوطن عند اللهايب الطلاقه والحذاقه والبذل والأريحيه ومن وزير الأمن نايف ماخذ نطح الصعايب وفيه من سلمان عرف وفيه من وصفه رويه وفيه من جدة سميه وفيه من كل القرايب من عمامه من خواله فيه من كلٍ مزيه فيك يا عبد العزيز العز مجدول الذوايب من عصر جدك ومن عصر الجدود الأوليه يا وطن خير الأنام ويا وطن غال الكسايب فيك يومض برق عز وفيك تصهل ضامريه وفيك حكامٍ تلاقى الشعب بصدورٍ رحايب عامرين الدار والبيتين بيدين سخيه يا وطنا فيك عشنا عمرنا والكيف طايب ما تغيرنا مساعي حاقدٍ والا سويه قل لخيلٍ ماتسمى وش بعد باقي عجايب عقب هاك الزحف وش باقي بعد من سو نيه من يقاشرنا يجي له يوم والمسكين خايب ومن تورط باغتيال رموزنا يصبح ضحيه يا فقيه ما تفقه كود في نشر الكذايب ملوكنا فخر الملوك ودارنا شمس البريه والقصايد في معازيب الوطن خضرٍ عذايب حبرها الإيمان يدفعها وتدفعها الحميه ما يفيد الشرح للي عن سوي الفهم غايب ولاتفيد دروس للي عايش في جاهليه في صلاح النفس اصلاح الوطن والعيب عايب وفي وطنا للصلاح رموز ونفوس رضيه يرحم الله أربعين سندوا فوق النجايب وعزم أبو تركي يشد الحيل من عزم المطيه ادرس التاريخ يا اللي ما عرف سيف العطايب وانشده ينبيك عن فعل الأسود اليعربيه يا وطن جيتك شعور صادق من قلب ذايب جيت أفاخر بالملوك وجيت أمجد بالرعيه جيت يدفعني الولا والحب وسلوم العرايب مطرفي من هذيل ان قيل أي المطرفيه جارك الله من نفوس تبتغي فيك الخرايب من خوارج من حواسد من عقول عنجهيه
