عساه بالفردوس

هذه القصيدة رثاء في الشاعر الكبير هواش بن عايد الحربي رحمه الله
البارحة نومي على راس كوعي
وأصبحت عن الناس مشغول بالي
قالوا علامك قلت علمٍ يروعي
هواش لا عتني عليه الليالي
ولوع قلبي من هاكالعلم لوعي
لوعة كسيرٍ طاح قفو التوالي
نوبه يطيح ونوبتين يفوعي
وأمسى عليه الليل والدو خالي
يقطعك يا دنيا الفناء والفجوعي
ما فيه يومٍ ما غدتله بغالي
لوعات بقعاء كل يوم تلوعي
ياما خذت من طيبين الرجالي
وأنا اخذتلي نادرٍ من فزوعي
عضيدي اللي بالصداقة صفالي
مرحوم يا للي من جزعنا جزوعي
عضيدي اللي ليا نخيته شفالي
حرٍ على لطم المعادي بتوعي
ليا شان من بين الرجال الجدالي
وادرعي اللي من خيار الدروعي
ليا جاء نهارٍ للسلاح اشتعالي
عليه هلن العيون الدموعي
وصفقت بالكف اليمين الشمالي
يا الله يا مغيث الوطن بالرجوعي
عساه في طوبى يجيله ظلالي
عساه بالفردوس بأعلى الفروعي
برحمتك يا معطي العطايا الجزالي
وعسى العوض في طيبين الطبوعي
عياله اللي يكسبون العوالي
وختامها لله سجود وركوعي
على النبي صليت بآخر مقالي