في رثاء الفقيد الشيخ سند بن صامل السليمي الحربي -رحمه الله-

علي المفضي

مرحوم يا شيخ بكوه العشيره
فرقاه تحزن للقلوب وتروعي
لو القدر مكتوب والله مديره
وحكم الولي ما له اليا جاء منوعي
والموت حق وقد وصلنا نذيره
والحق ما منه مفر وجزوعي
تبكيك يا شيخ عيونٍ كثيره
كلاً على فرقاك هل الدموعي
حتى الصغير اللي همومه صغيره
يمكن تكدر في حياته سبوعي
سجل لك التاريخ حسن المسيره
وبصمات فعلك باقيه له فروعي
وذكراك تبقاء والقراءة العطيره
بالمنبر اللي به تأم الجموعي
بصوتٍ ينور للقلوب المنيره
ويزود المؤمن صلاته خشوعي
وتأمر بفعل الخير نصح وبصيره
وفعلك ينور لو طفن الشموعي
ويشهد لك الداني وقاصي وغيره
على أفعال الخير من كل نوعي
ويشهد لك اللي ذاق منك البريره
تعطي ولا تأخذ برزقك قنوعي
سند سند راعي اليدين القصيره
اللي بفزعاته يشد الضلوعي
راعي العطا يوم الظروف العسيره
يافي ليا منه ترد الفزوعي
ويالله عسى الفردوس فيها سريره
بالجنه العليا يزيد برفوعي
يالله لعله كل خير جويره
أهل الشهادة يوم لبس الدروعي
يوم المعارك والمواقف خطيره
ضحوا بغالي الروح في كل طوعي
وصلوا على من خصه الله بخيره
على نبين للخلايق شفوعي