صنت الرياض وزاد تطويرها زود

يالله يا معبود يا خير معبود
يا خالق المخلوق رب البريه
يا مسيّر قبل المطر برق ورعود
يا خالق خلقك على مقدريه
في قدرتك عقب المطر يخضر العود
تحيي الفياض الهامدات الرميه
يا من باوامر قدرتك يجري النود
أدعوك باسماك العظام القويه
تفكنا من شر حاسد لمحسود
وتحفظ بلاد الخير من كل سيه
وتفكنا من شر مبغض ومقرود
أهل الحجج والعله الداخليه
ويالله جعل أيامنا سهود ومهود
والخير نفرح به بجمعه سويه
في ظل من في حكمهم نطلب الزود
هل البلاد اللي خطاهم قديه
عيال من بالكون ماكيد ويكود
اللي على خصمه يمينه جريه
عبدالعزيز محدد الملك بحدود
اللي ولاها سهله جرهديه
وخلا صحاريها بساتين وورود
يلقا بها المحتاج ظل وفيه
وهاذي محاصيله لها اليوم مردود
نجني ثمرها كل صبح وعشيه
منها مثل سلمان حيد من حيود
لطام خشم اللي انعفته قويه
وبالطيب نلت الطيب يا منبع الجود
ريف الضعيف اللي حواله رديه
من طيب راسك جت بالخير وتجود
يمناك في كل المواقف مديه
فعلت يا سلمان والفعل مشهود
وكل شهد تطوير نجد العذيه
صنت الرياض وزاد تطويرها زود
وقامت تضاهي كل دوله فتيه
خمسين عامٍ كلها اثبات وشهود
تثبت فعول وبالفعول النقيه
تبذل لجل تطويرها كل مجهود
وصلت بمجهودك الى العالميه
فرحان ضبعان المطرفي