ريف الضعيف اللي به الوقت مايل

حييت يا اللي للمناعير مزبان
يا الصارم البتار واف الخصايل
وأهلاً هلا بك عد ما كاين كان
وإعداد ما بانت بروق المخايل
وحييت يا عز الوطن ذرب الأيمان
يا ظلنا عن حاميات القوايل
استبشرت يا سيدي كل الأوطان
كلٍ لشوفك ناظرٍ للوسائل
وكلٍ على شوفك شفوقٍ وشفقان
ويا كثر من هم ناذرين الجزايل
يا سيدي شعبك يهلي وفرحان
وكلٍ يبشر صاحبه بالرسايل
كل يرحب يا سلايل كحيلان
بقدومكم من حضرها والقبايل
من العاصمة لحدود جدة وجيزان
ومن الجنوب لحد عرعر وحايل
ومن حد شرق المملكة لتبوك بإعلان
ومن الشمال لآخر أم الفضايل
الحمد للي كون الكون باتقان
على شفاكم يا ربيع الحمايل
أتعبت نفسك للوطن ما انت خسران
ما فيه مثلك شال جزل الثقايل
الله يديمك يا سلايل هل الشان
يا اللي على الطولات للعز طايل
عساك ما تشوف النكد طول الأزمان
والله يحفظك يا جزيل الفعايل
نايف حبيب الشعب في كل ميدان
راع الفعول الغانمة بالدلايل
أبو اليتامى عز من كان بلشان
ريف الضعيف اللي به الوقت مايل
سور الجزيرة لا على الجو دخان
من دونها يروي حدود الصقايل