قصيدة حائل للشاعر ذيب العبيدي

ابدا بذكر اللي خلق الانس والجان
اللي خلق خلقه كريم الفضايل
مرسل رسوله بالعقيده وتبيان
وفي بعثته وضح جميع المسايل
من بعدها ياهاجسي والوعد حان
خلك على مرقاك روس الطوايل
الليل غير ويقدح الزند صوان
وانا على منبر مشاكيل حايل
وان جيت حايل جيت والراس طربان
حبي لحايل جيت بعقال مايل
سلام ياشمر طويلين الايمان
تسليمة ترقا على كل طايل
اصفى من الصافي ومن عذب الامزان
يضفي عليكم ياعيال الحمايل
شمر هل الطالات من مر الازمان
واهل الكرم واهل الفعول الجزايل
شمر مقابيس الوغى ظل واكنان
لا شبت النيران روس الفتايل
شمر عمى العايل وللعلم برهان
تشهد لهم قب الخيول الاصايل
شمر كرم حاتم وهيبات برزان
كل العرب فيهم تسوق المثايل
شمرولو قلته فلاني بغلطان
شمر سنام المجد واهل الاوايل
جمع الطنايا تحتمي كل ميدان
يرفع علمها فيه وقت الدبايل
والليل ضيفان وفي ضيفة احصان
ضيفان دار وعند ذرب الخصايل
عماش ابن نايف على رمح وسنان
شيخ على الطالات مثله قلايل
شيخ مواقيفه تميز كحيلان
في كل ماقف له فعول ودلايل
يمناه تندى بالكرم طير حوران
حرا على الهدات صايل وجايل
قرم يحل الشايكه لا بدا شان
زيزوم قومأ مايهاب الشكايل
جده معشي الذيب للعز مزبان
ضلعً يذري من سموم القوايل
فارس شهر صيته ومن روس فرسان
نال الفخر والحر للطيب نايل
واليوم نايف معتلي كل مابان
حاز المراجل كلها والجمايل
ماخذ مواريه من الذيب سرحان
وماخذ من الحر القطام الصمايل
تكريمكم ياشيخ لشيخ جبران
تكريم لاهل الطيب واهل الفعايل
يستاهل التكريم من دون صفطان
للي معه حاضر كرام السبايل
لاشك طيبه قدمه بين الاخوان
رجل علومه بين ربعه كماايل
فعله ينومسنا وطيبه بليهان
مثل المزون معشبات الخمايل
قلته وانا شاعر ولي فكر ولسان
احب قول الحق والشك زايل
من دون ربعي وقفتي تقضي الشان
اقولها والراس شايش وطايل
ربعي مقاديم الفخر جمع قحطان
من غير قصره في جميع القبايل
وانا عبيدي من حرق صلب سلمان
سيفي مع كل السيوف الصقايل
واختامها وعداد ماهل ودان
صلوا على طه فريد الخصايل
ذيب العبيدي