(احزان وجراح)

شعر- ضي الفكر
نم يا حنين ولا تصحي لي الهم
ارتاح ساعه واترك القلب يرتاح
مدري متى شمل المحبين يلتم
ومدري متى همي عن القلب ينزاح
العاشقين دموعهم في المسا دم
على الوسايد تنزف احزان وجراح
عيونهم ع الوقت ياساعته كم
باقي ويرحل ليل من عقبه اصباح
الله وحده يسمع السر واعلم
من غير لاشكوى حزينه او افصاح
قلب رقيق وشبك صدره محطم
هبت عليه اوجاع وانفاسه ارياح
يالله ترفع بامرك الحزن والغم
وتكتب له الليله تباشير وافراح