أبشتكي

ابشتكي لك من عنا الوقت ياصاح
وما غيرك احدٍ عقب ربي اشتكيله
بن الشقاوه داخل القلب قد فاح
ومن سبة الهجران روحي عليله
مدري متى ظيم الليالي بينزاح
وارتاح من همٍ بصدري اشيله
ساد الظلام وعكرت جوي رياح
مدري انا في صبح والا في ليله
اعاني الغربه واعاني من جراح
وما عاد يا ابن الناس باليد حيله
وبرق الامل في داخلي ما بعد لاح
واحس عقبك في حياةٍ مليله
لا يا وجودي وجد مطعون برماح
او وجد من صابت ضلوعه فتيله
على رفيق الروح قلت آح ثم آح
يوم ان تذكرت الليالي الجميله
اللي قضيناها على ضحك وافراح
وشمنا عن اللي معرفتهم فشيله
واليوم طيري بالسماوات قد ناح
وما عاد لي غير القصايد وسيله
ادعي عسا الله يقبل دعاي واجتاح
كل الهموم الكايدات الثقيله
عادل بن سليمان المخلفي