قصيدة للشاعر ظافر بن عبدالله بن لعور

يقولون : قلّلت القصايد ،، ولالك شوف
وانا من عرفني العام ،، لايختلف ظنّه
اشرّف على شعر الجزاله ،، واحوفه حوف
واشوف اطيبه ،، واطرّفه ،، وانتقي منّه
ولكن على كثر السوالف ماني مكلوف
ولا احكي سوا لاشفت شي آحكي عنّه
غريب العلوم اللي لها دقّةٍ بالجوف
يدوّي صداها كلّ ماجيت باكنّه
مثل شوفة خطام المطيّه مع المردوف
يشدّه ،، وهي من غبنها جالها حنّه
وقويّ العظام اللي تعلّق بها الغضروف
بدا ينسَب لغضروفها الفضل والمنّه
وضوٍّ تشب بمجلسٍ مايجيه ضيوف
يبيّت وسط معمالها هيله وبنّه
وصوت الكلاش اليا لقم طلقة الشاخوف
مثل صوت من يكسر بقرط الحصا سنّه
اجادل مع العاقل ،، ولا اجاوب الملقوف
واذا قال طرّاد الغوى ،، ماعلي منّه
اغزل اللحا في مبرك الحق غزل الصوف
واطق الحَلَق في ملجم العوص و اعنّه
أغنّي ،، وبعض الناس ماهي عليه تطوف
هل المعرفه ما تجهل الفرض والسنّه
أخَبْر القلوب اللي بوسط الصدور تشوف
واذا عميت قلوب البشر ،، يالله الجنّه
ظافر بن عبدالله بن لعور