يامن ملكت قلوب شعبك بمعروف

مليكنا رمز الفخر صاحب الجود
يا مرحبابك يا ذرى كل ملهوف
حياك ربي يا فزع كل مضهود
يامن ملكت قلوب شعبك بمعروف
الشعب وافي والولاء فيه معهود
حبك كمن بقلوبهم داخل الجوف
والحب يرسخ بين والد ومولود
شعبك يابو متعب ملاهيف واشغوف
والكل عنده شوفتك خير مقصود
يا من على كل الرجاجيل بك نوف
صنت الحمى وأديت للشعب مجهود
الكل يسمع عن فعايلك وايشوف
من حيث فعلك له براهين واشهود
يالعاهل اللي بساير الشعب مكلوف
جودك على كل الوطن ليس محدود
تعيش يا حرز المواطن عن الخوف
تسهر وكل الشعب في ضلك رقود
حيثك ذرانا عن سمايم وعاصوف
فيك الذرى والضل عن لاهب النود
عساك ماتشكي من أوجاع غضروف
وعسى الولي ياقاك يا ناطح الكود
وعساك دوم بعافية ما تقول أوف
يلطف بك اللي للمخاليق معبود
الله يجيرك من عواثير واصدوف
يا قايد الأمة لك الأمر مسنود
يالحاكم اللي بالفضيلة لك اشفوف
يا ذخرنا كان الليالي غدن سود
أنت العوين لمن شكا ظيم وظروف
ريف الذي من جاير الوقت مسرود
وفرت للأيتام والرمل مصروف
وبذلت للمعسر معونات وانقود
ياما لجالك من مساكين واضعوف
عون المعاق وفاقد السمع والعود
تشمل بعطفك كل عايب ومكفوف
تبعت سلم أبوك والفعل ماكود
اللي اليا جوله مسايير وضيوف
دايم مضيفه للهواشيل مشيود
اللي مشوا خلفه طوابير واصفوف
ساروا مع القايد صوابير واحشود
جاهد وصان الدار عن كل ملقوف
رفرف علمها وانكعم كل مقرود
مضراب كفه للمعادي به احتوف
لاشك للصاحب به الخير والفود
سلطان نجد أن جوّد السيف بكفوف
جّرد حسامه وأنتخى بعزوة سعود
المعتدي يضرب علابيه بسيوف
سيف العدل يقضي على كل منكود
خلا العدو عضده مقيّد ومكتوف
وأقسم يمين وقال للشر ماعود
من عانده يبدي ندامات واحسوف
حكم بعدل وبيرق العز مشيود
عوج الدروب اللي بهم ميل وجنوف
عدل مماشيهم عن النقص والزود
ما توفي أوصافه عبارات وحروف
مجده عريق معقبه جد لجدود
عبدالعزيز اللي له المجد معسوف
الليث الأروع عقب نمور وفهود
اللي فخرهم في سجلات واكشوف
مبطي عليهم بيرق النصر معقود
الشاعر: عبدالله بن عبار العنزي