( بنت منجنّه )

من الشاعرات السعوديات المميزات تأتي الشاعرة (ونه ) من خلال ماعرف عنها من إبداع ،إقرأوا ( أم نواف ) من خلال قصيدتها (بنت منجنّه ) لتدركوا معالم تجربتها الشعرية الثرية حيث تقول:
ياروح الأبيات هدّي وأكتبي ونّه =من بين حدب الضلوع وبين خفاقي
معقول يعني بعيش العمر منجنّه =ماطاح راسي رضا لعيون عشاقي
أغليه.. وأوله عليه بصدق وآحنّه =من ضيق صدري ليا من ضاقت أخلاقي
مشيت لأجله سموم القيظ والكنّه =وقفت مدري وش اللّي قد كسر ساقي
حط القصايد بصدري والبلا بإنه =مجنون شعر وقصيده ماانتهى باقي
يحطب ضلوعي هجوس ويبتعد كنّه =ماشب صدري دفا من لأهب أعماقي
كل السوالف أبيها تنحكي عنّه =ماأشوف غيره سكن في داخل أحداقي
أدري المحبة مهي مني ولا منّه =الحب من عند رب الكون خلاّقي
الحب يعني عطا ماتلحقه منّه =تعطي غرامك لقا ماتطلب فراقي
الله مدري غرامه يوصل الجنّه =وإلا فراقه لظى موعود لإحراقي
حاله غريبه والأغرب بنت منجنّه =تكتب قصايد غلا وتشّق الأوراقي