سالم: الإعلانات ذبحتنا.. وأتمنى الالتقاء ب..القصبي

شاهد عيان من الشارع العام، على الأعمال الرمضانية ونجومها.. له وجهة نظره تجاه ما تابع من الأعمال وله رأيه الخاص بالطبع..
وش القناة اللي توقف عندها عشان تتابع عملا رمضانيا؟
أوقف عند القناة الأولى وإم بي سي وأبوظبي وبعض المقتطفات من القنوات الثانية.
طيب وش عجبك من الأعمال الرمضانية؟
عجبني «باب الحارة» و«زهرة أزواجها الخمسة» و«بيني وبينك» و«طاش ماطاش».
على كذا نقدر نقول إنك تتابعها كلها؟
لا مو كلها بس اللي أقدر ألحق عليه أتابعه واللي له إعادة أشوفها واللي ما شفته أشوف الحلقة اللي بعدها.
بصراحة لو حصل لك التمثيل بتقبل؟
لا ما أقبل طبعا بس أشوف.
ليه.. عشان النظرة الاجتماعية.. ولا فيه سبب ثاني؟
مو كل شخص يبي يمثل يصير مبدع لأن في كثير بيفشلون ولكن أنا ما عندي الموهبة أني أمثل ولا أحب التمثيل من الأساس.
تعرف أحدا من الفنانين معرفة شخصية؟
لا والله ما أعرف أحدا، ومدري وين يختفون رغم أن بعضهم في الرياض بس ما قد صادفت أحد فيهم.
من الفنان اللي تتمنى إنك تقابله؟
ودي أقابل ناصر القصبي وأحمد حلمي.
لو فرضنا أنك بتعزم فنان على مفطح مين اللي بتختاره؟
لو كان الفنان محمد العلي، رحمه الله، حيا بأختاره مباشرة بس الله يرحمه.
وش تعرف عن الفنان محمد العلي، رحمه الله؟
أعرف أنه الأب الروحي لكل الفنانين لأن له فضلا كبيرا بعد الله على كثير منهم وكان تواجده على الشاشة له هيبة وحب من الجمهور.
هل تعتقد أن أعمال رمضان العام الجاري أجمل من السنوات الماضية؟
لا والله بل أسوأ وكل عام نجد أن الأعمال في انحدار عن العام الذي يسبقه، وماندري وش الأسباب؟
وش رايك في الفواصل الإعلانية اللي تقطع كثيرا من المسلسلات؟
والله إنها مزعجة وذبحتنا، وبالعكس أي شركة تعلن احنا يصير عندنا ردة فعل عكسية ونرفض منتجاتها.
أخيرا تبغى تقول شي قبل الختام؟
شكرا لكل فنان قدم عملا فيه خدمة لمجتمعه وإنسانيته وأقل واجب أنا نقول لهم شكرا من القلب لجميع فنانينا.