البلاك بيريون

مساكين حقين البلاك بيري، بكره راح يحسون ان فيه شي منهم ناقص، من كم يوم والدنيا مقلوبة فوق تحت، دول كاملة مختبه ومختبصه وكله عشان البلاك بيري راح يلغون منه المسنجر، تقارير اخبارية، ومراسلين اعلاميين يهذرون، وهذا يصرح وهذا ينفي، وهذا يرسل ايميل للمذيعة يشكي ليش حنا يالمواطنين ما لنا أي اعتبار يلغون الخدمة بدون شورنا؟ اعتبار مين يا بابا؟ شكل الاخ طايح من بعير، خلاص الحين راح يطيح سعر البلاك بيري، راح تلاقيه بتراب الفلوس، عشان تعرفون ان ربعنا يموتون بالخنبقات والامور الهايفة اللي ما لها سنع، البلاك بيري فيه الف شغلة ممتازة غير سالفة المسن، بالعكس المسنجر من جانا ما جانا الخير، تلاقي مجلس كامل كل واحد فيهم حاط راسه بالبلاك بيري حقه وما غير يسولف ويهذر مع اللي معاه، في مسن البلاك بيري، بس تسمع طنطنة المسن، وكن هالمجلس مسكون الله لا يبلانا، تطالع في وجه الواحد منهم، شوي ويبحلق كنه شايف جني وشوي ويكرها ضحكة، وشوي يناديك عشان يقرا لك وش وصله من مسجات او نكت تكون انت سامعها من سنة جدي، يا دافع البلا، كل هالصجة عشان الغاء المسنجر من البلاك بيري، بالعكس احس ان فيه ناس من سمعوا بهالقرار ارتاحوا كثير، حسوا ان جلسة العايلة والا جلسة الاصدقاء راح يكون عليها القيمة، اعوذ بالله من جانا البلاك بيري وانت تدخل المجلس تبي واحد يعطيك وجه عشان تسولف عليه ما تلقى!