ما فيه مثلك

يا قلب وش علمك تبيح بخوافيك
ما فيه مثلك من يبيح اسراره
أبا انصحك كان النصايح تقديك
وأن كان تدفع بالنصايك أمهاره
ولا تحسب أني بالنصايح معاديك
عز الله أني محسنٍ فأختياره
راع الدنس لا تقربه في مماشيك
دايم على الشينات تطول أشباره
لا تاصله لوه قريبٍ باراضيك
خله بعيدٍ مندفن في أغباره
وأبحث عن اللي لا نخيته يلبيك
قرناس يفهم طلبتك بالإشاره
ثم أنتبه بعض المخاليق يغريك
اللي تبسم لا جلست بجواره
ما كل من يضحك من الناس يغليك
ولا كل من بشر يريد البشاره
أحدٍ ضحك لك لأجل يوهم هقاويك
وأحدٍ سرورك غايته من اخباره
شخصٍ اليا شافك مريضٍ يداويك
وشخصٍ تمنا طيحتك وسط ناره
أهل الشهامه بأغلى الأثمان تشريك
وألا الردي دايم يبيع بخساره
ناسٍ تخالف طبعها والمساليك
مخالف البدوان لأهل الحضاره