لآلئ شعرية

يا قلب ما تنفع تكون الرياسي
يا كم نصحتك تاخذ العقل نبراس
يمديك يا قلبي محنك سياسي
من كثر ما مرك من اشكال واجناس
لكن عيبك مندفع منت راسي
ما تستفيق إلا بعد تاقع الفاس
واعود واذكرك لو كنت ناسي
ما كل طيرٍ يستحق إسم فرناس
لا تندفع مع كل هرجٍ حماسي
كم هرجةٍ راجت وهي ما لها ساس
ولا تنثني للوقت لو كان قاسي
ولا تطلب الإحساس من فاقد إحساس
يكفيك ما عرضتني من مآسي
طيبتك ساقتني على سكة الياس
لعبت بي الأيام لعب الكراسي
كم مرةٍ وقّفت والناس جلاس
لولا الوهم حطمت رقمٍ قياسي
ولولا الجهل ما طعت ابو راي منحاس
كنت افتخر واقول ربعي وناسي
والمشكلة ما خذت عبره من الناس
اقول خلاني عدد شعر راسي
واليوم شفني شايبٍ واصلع الراس