لآلئ شعرية

يا قلب ما تنفع تكون الرياسي
يا كم نصحتك تاخذ العقل نبراس
يمديك يا قلبي محنك سياسي
من كثر ما مرك من أشكال وأجناس
لكن عيبك مندفع منت راسي
ما تستفيق إلا بعد تاقع الفاس
وأعود وأذكرك لو كنت ناسي
ما كل طيرٍ يستحق اسم قرناس
لا تندفع مع كل هرجٍ حماسي
كم هرجةٍ راجت وهي ما لها ساس
ولا تنثني للوقت لو كان قاسي
ولا تطلب الإحساس من فاقد إحساس
يكفيك ما عرضتني من مآسي
طيبتك ساقتني على سكة الياس
لعبت بي الأيام لعب الكراسي
كم مرةٍ وقّفت والناس جلاس
لولا الوهم حطمت رقمٍ قياسي
ولولا الجهل ما طعت ابو راي منحاس
كنت افتخر واقول ربعي وناسي
والمشكلة ما خذت عبره من الناس
أقول خلاني عدد شعر راسي
واليوم شفني شايبٍ وأصلع الراس