يا وجودي

مرت ايامي وعدت بي ليال
ما نسيتك لو نست ربعي مواجيب الدخيل
ويا وجود اللي حفظ دمعه وتالي العمر سال
وجد من عاف الزمان وصار به عابر سبيل
عاف حتى الذكريات اللي مضت والهجر طال
لا طرد حلم السراب ولا رواه السلسبيل
كان ونك يالغلا تدري بحظي كيف مال
لا تعاتبني ليا من ضمني درب الرحيل
والعذر ما عاد ينفعني ولا احب الجدال
يالهنوف الناعسات عيونها ضاع الدليل
اذكري كم كنت احبك واذكري عهد الوصال
واذكرك كم كانت الدمعه على خدك تسيل
واذكريني يا حياتي دام به شمس وظلال
اسألك بالله لا تنسين يالطرف الكحيل
واذكرك يوم الوداع المر يا كل الدلال
يوم حانت لحظة الفرقا وانا قلبي عليل
يوم قفيتي وانا وصلك معده راس مال
لا بقي لا راس مال ولا بقى بعدك حصيل
مرت ايامي وطيفك حي فيني لا يزال
والسؤال اصبح جوابه رهن بيدين البخيل
يوم قفت من خذت قلبي وطالت بي ليال
ما لنا يا شوق غير انساه والصبر الجميل
شفت كيف ان المحبة طيف من نسج الخيال
بعد ما كنا حبايب كل هالعمر الطويل