«ابتديتك عشق»

من بداية صوتك.... لغاية جمالك
ابتديتك عشق يضوي لي سنيني
كيف ناوي تحرم عيوني وصالك؟
وانت تدري وش يسوي بي حنيني
والله انك لو تفكر في خيالك
لو بعدنا من غيابك.. وش يجيني
تعرف دروب تودّي للمهالك
يشهد الله ما امتطيها تمتطيني ؟
ايه احبك حب ما يخطر ف بالك..!
شي احسه وسط قلبي مبتليني
اشهد انه باع هالعالم... وجا لك
لين صارت صورتك ترسم بعيني
لو تصدق بس لا يطغي دلالك
بعترف لك سرّ ما بينك وبيني
يوم قلبي ي ارْيش العينين شالك
غار منّه كل عرقٍ.. في يديني
شف تصوّر.. كل مافيني حلالك
هو بكيفي؟ غصب عنّي مايبيني
كيف يرضى يسكن احساسي بدالك
وانت اسمك منكتب لي في جبيني
بس تعوّذ من.. هجوس ليا طرالك
بسم ربٍ في جلاله.. نستعيني
جعل فالي منتهى الفرحة.. وفالك
جعلني ماموت من بعدك.. حزيني
فيك ابختم وآتقهوى من دلالك
جب يسارك واحتضنها في يميني