أبعد عن الانذال !

بديت بسم اللي علينا جمايله
... ... اعداد ما هلت مزونٍ خيالها
واعداد من زار الحرم والمدينه
... ... وعد السنين اللي تقافت اجيالها
انا الى مني بدعت المثايل
... ... اخترت من زين المثايل جزالها
احوفها من ذلةٍ ينتقدني
... ... ناسٍ من الامجاد تقصر حبالها
اتصايد الفرصات مقطوعة الجدا
... ... وتخون بالصاحب الى من صفالها
اتشوف عيب الناس ما تشوف عيبها
... ... ناسٍ عسى ربي يعجل زوالها
الكلمة الخجلة تجود سبوقها
... ... والكلمة العليا تبعد مجالها
هذي طبيعتهم وهذي سواتهم
... ... الانذال ياتونك انذالٍ عيالها
ساس الردى يلحق ولو طوّل المدى
... ... يلحق مثل لحقة يمينك شمالها
لا شك انا بنصح هل الطيب والوفا
... ... تبعد من الانذال قدر احتمالها
النذل فيه من الدلايل مواري
... ... تلقا النذل يجلس مجالس انذالها
ويلز نفسه مع رجال الشكاله
... ... يبغا يقلدها ولا هوب حالها
لا شك انا بكشف اسراره ومهنته
... ... يصاحب الاجواد من شان مالها
الانذال وقفات الرجوله تكودها
... ... بطلب عسى الله ما يكثر امثالها
هذا مثل قالوه ناسٍ اوائل
... ... الانذال لا تعنا ولا ينعنا لها