لوعة الفراق

عقب صلاة الفجر رن التلفون
وبديت أكلم واسمع اللي يصيحون
قلت الخبر قالوا نعزيك بأمك
وضاقت بي الدنيا على يقولون
وصفقت كف بكف مما سمعته
يابوي علمك حط في قلبي طعون
أم الجميع اللي فقدناه يابوي
اللي عليها كل الأجواد يبكون
معروفة في طاعة الله والاحسان
وتذكر مع اللي باخر الليل يدعون
أم الوفاء والخير يابوي ما نساه
انا وغيري من فراقه ينوحون
ثم امتلأ المسجد شبابا وشياب
صلوا عليها عالما ما يعدون
والكل منهم دمعته فوق خده
على النعش شيلت والأعمام يبكون
بالقبر حطوها وفكو كفنها
دلو عليها من التراب يهلون
وبلوا تراب القبر دمع الأعيان
وفي جدتي يابوي قاموا يعزون
وبيوتنا مفتوحة خمسة ايام
ومن سمعته ناس يجون ويروحون
واعزي الصالح وكل التواجر
في جدتي يابوي بالحق ترضون
وختامها يارب تغفر خطاياه
وتفوز بالجنة مع اللي يفوزون
@ رثاءً في جدتي فاطمة الصالح (أم ابراهيم)