بيت وصدى

كان بيت الأسبوع الماضي للشاعر ناصر بن جمعان ال عوض من وادي الدواسر حول ضعف المراقبة على نظافة استراحات الطرق السريعة واهمالها وعدم الاهتمام بها والذي يقول:
الوضع مزري والنظافة قليله
حال استراحات الدروب السريعه
وكان صدى البيت من الشعراء:
اي والله ان الوضع ياطول ليله
مزري ومزري والخفايا شنيعه
لا من نظافه والرقابه قليله
والا المطاعم بالتسمم سريعه
الا متى والوضع مافيه حيله
ياهل السياحه مابقى من ذريعه
احمد بن ناصر المحرج - الرياض
ياللي تسافر والمسافه طويله
ابعد عن السرعه تراها شنيعه
خذ راحتك مفروض وقت المقيله
بعض المواقع بالنظافه وضيعه
تفتيشها مطلوب وافضل وسيله
قرب الطرق مطلوب خدمه رفيعه
عبدالمحسن بن محمد المحيسن
- رياض الخبراء
حال على الله يوم شفته عليله
مايسعداللي سار يبغى الوسيعه
كلش خراب ياخواني فشيله
والشي ماينقال والله شنيعه
والمشكله مافيه حل بديله
غابت رقابه والمواقف فضيعه
الحال هذاالحال يلي تسيله
في كل مكان اعتبرهاطبيعه
حمد عبدالله الوايلي - حوطة سدير
لو يرغبون الحل بأحسن وسيلة
ويوفقون الناس لأذن سميعه
ليت المخالف يلتزم بالفضيلة
ويقدم الطيب بما يستطيعه
حطوا نظام للعوايق يزيله
لا صحت النية فكل يطيعه
علي رشيد الرشيد - رياض الخبراء
فيه استراحه ما بها إلا الفشيلة
لا جيتها تلقى المناظر شنيعة
وفيه استراحه ودك إنك تزيله
ما تدي الواجب ولا هي مطيعة
تركض ورا الدنيا لأجل الحصيلة
ولا من نظافة شينها من طبيعة
محمد عبدالعزيز الخنيفر - أشيقر
البعض منها ما لقينا مثيله
حيث الرقابة يا جماعة شجيعة
تلقى استراحه من سنين طويلة
مهجورة يا أهل النفوس الرفيعة
تكفون هموا يا الرجال الأصيلة
نوقف المخطي ولا أحد يطيعه
ريان محمد الخنيفر
بعض المحطات الكبيره فشيله
اوساخها بانت عليهم فضيعه
وين الرقابه غايبه كل ليله
خص البعيد اليوم مهمل طبيعه
دام المساجد ماوراها حصيله
اهمال واضح بالخطوط السريعه
عبدالكريم ابن خزيم - البكيرية
ترى السفر نارٍ ولا فيه حيلة0
هذي حياة الناس بارض وسيعة»
مع همّ دربه همّ زود يشيله0
من وقفة فيها النظافة قطيعة»
وا عزتي للي دروبه طويلة0
خوفه من أكل وشرب ونفسه رفيعة»
عثمان ابراهيم الرشيد - الرياض0
بيت الاسبوع
للشاعر خالد المرشود: حول دخول الوسم وهدة الطير والقنص ويقول:
هب البراد وزان جو المطاليع
والطير زانت هدته ياهل الطير
نستقبل صدى هذا البيت بثلاثة أبيات فقط تدور حول هذا الموضوع
ويفضل الإرسال عبر الإيميل:
rb-khozama@alriyadh.com
أو على الفاكس 4871070/ 011
كما يسرنا مشاركة القراء بموضوع البيت ومن الشعراء بطرح بيت الاسبوع حول اي موضوع.