بيت وصدى

الاسبوع الماضي كان بيت الاسبوع حول مقترح الاخ سعد العبد المحسن حول وجوب الحذر من التواجد في مجاري السيول وبطون الأودية اثناء خروجهم للتنزه والرحلات البرية وخاصة موسم الامطار.
ارسله للصفحه الشاعر حمد عبدالله الوايلي الذي يقول:
يا صاحبي بالك تقرب من السيل
كم واحد في غفلته جاء وشاله
وكان الصدى من الشعراء
ابعد عن الوديان بالحيل بالحيل
دفاعنا مشكور حذر وقاله
بعض الشباب اليوم متهور حيل
السيل خطر لا مشى في مجاله
كب المشاكل واترك المزح بالسيل
كم حاجز قدامه اليوم زاله
عبدالمحسن بن محمدالمحيسن
خلك حريص خص لا صرت بالليل
اخشى من امر مقبل وانت داله
واحذر من اللي خوته تبرد الحيل
ما ينعرف ميل الرجل من عداله
واحرص على اللي ينقل الحمل والشيل
هذا رفيق لا تدور بداله
علي رشيد الرشيد
الجو روعه والمطر زاد بالحيل
اوصيك لا تقرب دروبه وجاله
ابعد عن الوديان في حزة السيل
تراه يجرف كل من كان جاله
احذر وتسلم جعل دربك تساهيل
الله يحفظك من دروب الجهاله
ناصر مسامح الشملاني - الرياض
لا تامنه خلك من الحط والشيل
حذراك تلقي بالنفس في حباله
وراك من ينتظر ملفاك بالحيل
بعدك ترى الشيبان تمسي كلاله
يا صاح لا تمشي طريق الغرابيل
تكفى طلبتك يا سليل الشكاله
علي آل زولان الفيفي - بيشة
إحذر مجار السيل بالصبح والليل
واللي تراخا شوف ياناس حاله
وكم من مكان كان جوِّه تعاليل
لا صار مجرد السيل مالي وماله
وعن مجار السيل تلقى تباديل
تكفي فجاج الارض سهل أو تلاله
سعود عائش الحربي
خصن بطون الاوديه سيلها يهيل
يجي جذيب من بعيد خياله
اقعد على حزم رفيع عن السيل
لي داهمك لينك تزبن جباله
دربى مواتر ودف جذوع وبراميل
وايضا الذي في باطن شعيب شاله
عبدالعزيز بن سعود الهزاع - نعام
الي يبي الكشته وزين التعاليل
حذرا يقرب من طريق المساله
يجهز الهرفي وطقم المعاميل
ويشيك الموتر وياخذ عياله
ويحاول يعود قبل يضوي الليل
لان الظلام احيان خطر وباله
نستقبل صدى هذا البيت بثلاثة أبيات فقط تدور حول هذه القضية الهامة
ويفضل الإرسال عبر الإيميل rb-khozama@alriyadh.com
او على الفاكس ( 4871070 / 01 )
بيت الاسبوع
تجاوبا مع مقترح الأخ عبيد مونس العيد من الرياض حول وجوب التشديد في رقابة الابناء اثناء الاجازات ارسل للصفحه الشاعر عساف بن عايض العتيبي من الرياض هذا البيت.
حان الربيع وحان وقت الاجازات
واهم منهنه فلذات الاكباد
مقترح لموضوع بيت الأسبوع المقبل بعث للصفحة الاخ خالد الطيار بموضوع الاهانة التي يتعرض لها المعلم من قبل الطلاب.