صوت الصورة

هدّ السلوقي صاد له أرنب البر
انثى كبيرة حطها بين فكين
فكه تقل قضابة أوراق دفتر
يكبس ولا يوذي عروق الشرايين
ووقت التزاوج خل الأرنب تكاثر
تعيش في الصحراء تجوب الميادين
سعود عبدالعزيز الهزاع - نعام
من يوقف القناص لأجل الطبيعه
صحيح بعض الناس للقنص هاوين
شوفوا السلوقي حط الأرنب صريعه
أقول يا أهل القنص بالحيل مخطين
هذي نصيحة ليت من هو يطيعه
ورسالةٍ للي على الخير ساعين
محمد عبدالعزيز الخنيفر - أشيقر
لا والله اللي صادها اليوم سرحان
هذا العشاء ما بين الانياب شاله
الذيب ذيبٍ ما مسى ليل جوعان
الذيب يشبع.. ثم يشبع عياله
الغاب له حكم القوي فيه شبعان
ومنهو ضعيفٍ عزتي له وحاله
عثمان الرشيد - الرياض
يا طيب طيبه ذا السلوقي ومجناه
اللي يدسّم صاحبه من فريسه
ماهر بصيده ما يبالي وممشاه
يعجبك يومه ما تعدى مديسه
يومه لزمها فالهوى ما تمناه
إلى انطلق ما توحي إلا حسيسه
حمد عبدالله الوايلي - حوطة سدير
الصيد في جواً كثيراً عجاجه
ما هو بصيد الحر يتبع طريده
واللي يشوف الصيد جاوز حجاجه
يقنص ولو لرياح كانت شديده
يوم السلق حط القنص في مزاجه
يكفي تميز صورته بالجريده
عادل عبدالعزيز الحسين – الرياض
ياما حلا المقناص وقت الربيعي
فرضٍ خلا فيه الخزامى ونوّار
وهدّ السلوقي وانتبه لا يضيعي
والصيد يحلى يوم يطبخ على النّار
بشائر القحطاني - الرياض
نرحب بمشاركاتكم الشعرية وما تلتقطه
صورة العدد السابق