صوت الصورة

وشلون صدت الريم والريم صياد
بالجيد والخصر المهيف والاعيان
ليتك مخليها تكاثر بالأعداد
حنا نبيها تنتشر قدر الإمكان
عقاب بن سقيان العتيبي - الجمش
طاح الظبي ما بين صايد وكلبين
عيات فيهم من سقي الأرض دمه
الكلب حط أيديه فوق الكراعين
وراس الظبي صياد بالكف زمه
عبدالحميد الأحمدي
بعض السلوقي يا عرب نادر النوع
لا شاف زول الصيد مافك ظله
وفريسته لا لمحته وقفت طوع
لو هو غزال الريم وقف محله
مبارك حمد الدوسري - السليل
الريم مع قرنه تشده بيمناك
مجروح طايح يحتضر في مكانه
عنه السلق إنشد يمينك ويسراك
خص الذي يمناك دالع لسانه
فهد بن عقيل الطويان - بريدة
يا ونتي ونة اللي صادر بين عداه مطروح
واحد يمينه.. والآخر من شمال محاصرينه
إن كان بك شده فاركض يعل دروبك سموح
خل السلق لا رجع تصفق يساره مع يمينه
لطيفة بنت محمد العبدالرحمن - الرياض
لا واحسايف على اللي طاح
بين السلق هن وراعيهن
امنولن قبلهم مرتاح
وسط البراري ومراعيهن
عبدالكريم عبدالرحمن السلوم - القرائن
الظبي ما تجيبه السلقان
صيدها الأرنب مع العبله
يا زين مشي مع البران
في خبة نبتها ربله
شبيب بن حمود القحطاني - المزاحمية
دار الزمن واخلف العنوان
واظهر لنا خافي اموره
وشفنا السلق صايده غزلان
ووسط الجريده لها صوره
عادل بن سليمان المخلف
ياللي مسكت الوعل بالهون.. بالهون
أطلق سراحه لأجل تكثر ذراريه
هذا عمل مرفوض ياللي تعرفون
أرحم غزال عاجز لا تذاريه
عبدالمحسن بن محمد المحيسن - رياض الخبراء
الريم ينزف من يدين السلوقي
وانته بدم بارد تاخذ صور
حرام وأذكر للبهايم حقوقي
تنحب مثل اللي لها عيون حور
سعود عبدالعزيز الهزاع - نعام
يا بكر جددت للقلب الصوابي
بالغزال اللي على الصوره غدا به
راح وقته يا بكر لا واعذابي
من غزال يقفي ويجيبه
محمد بن فهد الجلعود - مدينة سميراء
نرحب بمشاركاتكم الشعرية حتى مساء الاثنين على الفاكس رقم 0701784 أو الإيميل الخاص بصفحة الخزامى: khozama@alriyadh.com، زاوية (صوت الصورة).. ويا هلا.