روحة بلا ردة

تقول وشلون قلبك طاعك تفارق
واقول تطنيشك اللي زاد عن حده
البعد حارق وصال وصالك الحارق
وأشوف أنا راحتي بالبعد والصدة
ضيعت عمري على باب الرجاء طارق
سلكت كل الطرق لا شك منسدة
كم لي في بحر الأماني والوهم غارق
إن قلت حان الجزر يجتاحني مده
قيدت قلبي بحبل ٍ من أمل خارق
الوقت طال وقطعت الحبل بالمدة
والحب لامن طلع مني طلع مارق
يروح من ضامري روحة بلا ردة
أنتي قتلتي الوله في رمحك الزارق
والله يعينك على فرقاي والعدة
لا صار وصلك عذاب أبرك لي أفارق
الصبر موجع إلى من زاد عن حده