لا ضاق صدرك من الناس

يا صاحبي لا ضاق صدرك من الناس
واتحس هالدنيا تجي عكس ودك ..
ازبن لرب الناس يا طيب الساس
وارفع يدينك للذي ما يردك ..
عشنا وجربنا مخاليق واجناس
يا قل منهم في لزومك يسدك ..
بعض البشر يا خوك وسواس خناس
لا هو يجيك بخير لا هو يهدك ..
والبعض يشكي لك مقادير واتعاس
وان جيت تشكي له همومك يصدك ..
هو صح فيه الخير في غالب الناس
لكن زمانك بيح اليوم سدك ..
جمع عليك اشكال ما ترفع الراس
يعني على ما قيل ما هيب قدك ..
حدك عليها ساس واخلاق واحساس
يعني مشيت بسلم خالك وجدك ..
لكن ذهب معدنك ما يقبل انحاس
الوحده ابرك من رفاقه تهدك ..
دور على اللي فيه رفعه ونوماس
وان طحت قبل اتطيح دايم بحدك ..
الكيف عنده بن أشقر ومحماس
يعني خوي جالك على كيف ودك ..
ذاك الذي لا جيت ضايق ومحتاس
اطلب وغير القول لا لا يردك ..
وان ما لقيته لا تدور على الناس
يا قل منهم فالشدايد يسدك ..
حمزة الهاشمي