دامك بخير كل شعبك بخيرات

الحمد للمعبود رب البريات
أنعم علينا سيدي حين عافاك
باسم الوطن يا سيدي لك سلامات
عارض وزال كل شر تخطاك
دامك بخير كل شعبك بخيرات
تسلم لنا يا رمزنا لا عدمناك
معذور ظهرك لو شكت فيه فقرات
أجهدت نفسك لجل تسعد رعاياك
حنا يبومتعب برهن الإشارات
آمر تجدنا كلنا حسب مبداك
يا طيب المنهج ويا طيب الذات
أنت الزعيم وكلنا نتبع اخطاك
ما بيننا وبينك حجاب ومسافات
طبع التواضع ميزةٍ من سجاياك
أسعدتنا في كل يوم قرارات
تمطر سحايبها مكارم عطاياك
في عهدكم عشنا الرخاء والمسرات
الخير كل الخير مدته يمناك
أعلنتها نهضة بكل المجالات
يا باني أمجاد الوطن زان مبناك
دعوة حوار أطلقتها للحضارات
رحب بها من سمعها من شفاياك
ناديت بالوحده ونبذ العداوات
يا مصلح بين الأمم طاب مسعاك
نشوف فيك القايد الفذ ما مات
عبدالعزيز اللي سماك فوق الأفلاك
يا خادم البيتين راس المروات
أرواحنا وأولادنا كلها أفداك
يا سيدي نحبك ولا هي شعارات
الله يديمك يا ملكنا وياقاك
ناصر بن جمعان آل عوض
وادي الدواسر