استغاثة

الواحد المعبود رب البرايا
يا لله بسحبن كلها خير ومزون
قنوفها تشبه جبال السرايا
يا منزل الرحمات يا مبدع الكون
يا واهبن خلقك كثير العطايا
وسميتن من دعوه إلي يصلون
وابل مطرها بالسهل والحجايا
تبتل ثلاث ايام والناس يرجون
شوف الخباري والمقاري ملايا
ومن سيلها كل الفلاليح يسقون
وتصبح فلايحهم من الما روايا
واهل الدبش فرحو ولا عاد يردون
تريحوا من شيل سقي الظمايا
وإلي مع الذيدان وإلي يحوشون
ما عاد يطرون التعب والعنايا
والارض تنبت كلها عشب وفنون
وحزومها لبست بعد هي عرايا
والبل تهادى مشيها صار بالهون
لاجا الضحى تبرك شباعن غشايا
واهل الغنم ماعاد يطري يشدون
بديارهم تشبع كثار الرعايا
والناس من زين البساتين يجنون
ويسرهم ريح الورد والشذايا
حدودها من غور الاردن وعجلون
وتحده القبلة وسبت العلايا
والشرق ياصل ديره إلي يحد قون
والصلب والرمله من المامرايا
من وقعها كل المخاليق ينسون
العسر والشده وامورن رزايا
يا سامعن في قاع الاهوال ذا النون
أطلبك تسمع دعوتي يارجايا
وصلاه ربي عد ما هم يطوفون
على نبي الخلق زين السجايا
محمد بن نوار