يغيب الشعر بغيابك ولا شفتك رجع لافي

عشقتك مثل مايعشق طفل حضن امه الدافي
عشقتك مثل ماتعشق عصافير الشجر تغريد
انا لك من مجاميعي عطيتك قلبي الوافي
وسلّمتك مفاتيح الفؤاد وسوّبه ماتريد
ابيك اتعيش في وسط الخفوق وتكشف الخافي
تشوف ان المحبة لجل عينك كل يوم إتزيد
طلبتك لاتفارقني ترى ماصارلي كافي
حرام إتغيب عن عين (ن ) سهرها دايماً تنكيد
انا من غبت عن عيني ونومي للجفن جافي
اطبق في خفارات السهر واعيدها تجديد
كفاك إغياب ياخلِّي ترى حبي لكم صافي
انا قلبي تحمّل مايكفِّي ماحتمل تمديد
وأنا من كثر ماتكّي بكوعي تعبت اكتافي
افكر في غصون ٍ طيرها ماعاد إله تغريد
عليك الله لو تاتي ركوبه لاتيّك حافي
وامدّ اخطاي في وصلك ولو حطوا برجلي قيد
يغيب الشعر بغيابك وٍِلا شفتك رجع لافي
تغنيلي بحور الشعر بحضورك لحن ترديد
قصيدي يتبع انفاسك واشمّه في صدر قافي
يفوح إبهاجسي عطر القصيد وينتشي تمجيد
سليمان الخضراني