غيبتك مرة

وش سبايب غيبتك قلّي فديتك
لا تعلّقني وأنا مابي جَلاده
ل/انتظارك بعد ما لهفه ضميتك
ليلة البارح وطيفك لي وساده
احتريتك واحتريتك واحتريتك
يوم راح الليل واتّفتّق سواده
وبان صبح مع تغاريده قريتك
ابتدا شعري يسطر من مداده
ما يسليني وانا ماقد سليتك
لا طريت الشعر يعبدني عباده
الشعر بلوى وأنا فيه ابتليتك
من حروف الشعر لبّستك قلاده
تبخل بمدّك وأنا ياما عطيتك
مشكله لاصار فيك الصد عاده
وانت تدري لا رجعت البيت بيتك
ليتك تقدّر غلا القلب وداده
وياكثر ما قلت لك ليتك وليتك
ماحدن حصّل بهالدنيا مراده
وإلا انا لو هو على كيفي نسيتك
السهر لو هو تعثر بي جواده
وانثنى جفني مع أحلامي لقيتك
لكن اشهد لك، ولله الشهاده
من شرب شوفي لشوفك مارويتك
كل شي يُمل منّه بالإعاده
غير شوفك والتفاتك لا دعيتك
ادري انك منت في حاجة اشاده
مختلف حتى بلبسك واتكيتك
شاعرك عاده على خبرك وعاده
ايتوجه للقصيد ان مر صيتك
ياصباحات البيادر والسعاده
انتهى موسم حصادك ماجنيتك
شعر/عطاالله ممدوح