صوت الصورة

البر متعه تجلي الهّم والضيق
في نقرةٍ والربع من خيرة الناس
والجيب دك الحزم بالحمل ويطيق
أنا اشهد انه بالمكاشيت نوماس
سعد الحمّاد - روضة سدير
ياما حلا نوض برق الصيف
في ليلةٍ جوها هادي
وليا امتلت روضة الغريف
تشوف نبت النفل بادي
غازي قاعد العتيبي-الدوادمي
ياما حلا الطلعات في فصل الامطار
مع القرايب والرفاقه والاحباب
في جلسةٍ فيها السوالف والاشعار
والشاذليه بيننا وريح الاعشاب
محمد بن عبدالعزيز الخنيفر - أشيقر
عند النفود وبين نبتٍ له أزهار
أهل الجيوب موقفين يتقهوون
ريحة نباته كنها اعشاب عطار
وقرقاص وبقرى لو تبي عب ماعون
سعود عبدالعزيز الهزاع - نعام
ياما حلا عقب المطر جلسة الكيف
في صحصحٍ مابين رمث ويسباس
لاهبت النسري معه تجلب الضيف
اللي على الدله عموس ومحتاس
عبدالكريم النغيمشي - الربيعية
الجو يا محمد تعدل على الكيف
لاهوب حر ولا بجوه برادي
فلة حجاج تجمع اهل المواليف
ربعٍ نشاما كل منهم ينادي
حمد بن عبدالله الوايلي- حوطة سدير
ياما حلا البر والكشتات
لا صرت في روضة التنهات
ربعي هل اللاند والشاصات
بهارات والكيف والكبسات
عبدالكريم عبدالرحمن السلوم - القرائن
يا بكر بن هذال هذي سمتنا
لا فاضت الاكمام والجرهديه
قمنا وحددنا المكان وكشتنا
والكل منا يتصل في خويه
علي آل زولان الفيفي - بيشة
هذا مكان ممحلٍ يا النشامى
يسفي عليكم سافي الطعس بالهون
ما شفت نبت الدبل والا الخزامى
يا الله تغيث الناس في سحب وأمزون
عبدالمحسن بن محمد المحيسن
هيضتنا يا اليوسفي بالسيل
هيضتنا بالبر.. ومكشاته
لاسالت الريضان شد الحيل
ترى طرات الروح مشهاته
رائد بن مناحي بن مسعد - القرين
شوف الصحاري والفجوج الوسيعه
يجلي هموم القلب لو كان ضايق
قلبي من الفطره يحب الطبيعه
لو كثروا وسط المدينة حدايق
بدر الشمري - حفر الباطن
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070 زاوية
(صوت الصورة)
ونرحب بالصور الهادفة والطريفة .. ويا هلا
صورة العدد تصوير الزميل أحمد عائض الشراري