الله معك

دامك تدور للمفارق عن اسباب
الله معك وفجوج ربي وسيعة
خل العتب واقفل ورا صدك الباب
لاصرت باغيها فراق وقطيعة
نقوى على هجرك اذا خاطرك طاب
لا تحسب ٍ صدمة بعادك شنيعة
هذا الغلا والقلب وعروق الاعجاب
وما عاد لك بالحفظ عندي وديعة
سج القدم , دوج وتلقى بالاجناب
اصحاب واحباب وخواطر هزيعة
اكسر وجبّر بين صادق وكذاب
هذاك يشري ذا , وهذا يبيعه
واذا لقيت احباب حنا لنا احباب
لو الغلا ماطاعنا مانطيعه
من باعنا برخيص بعناه بتراب
طرد المقفى للمذلة ذريعة
والله ماقبل حب قانونه الغاب
وانا بظل العدل حكم الشريعة
الذل لله خالقي رب الارباب
ماغيره احد ٍ له خضوعي رفيعة
مانيب قايل لك ترا الشوق غلاب
خل الليالي والليالي سريعة
باكر تجي مشتاق والحب قد غاب
ولاني براضى فيك دامك رجيعة
اللي بدون اسباب يبحث عن اسباب
لا يشتكي غبن الهجر والقطيعة