وا جاشي اللي ممتلي بالدواويش

تدوش به الافكار كن دق مهباش
قافن بدعته وابتديته على إيش
ينبش ثمين الشعر والهم نباش
مغشوش بعض الناس في غاية العيش
بآعيش طيب ذكر ماعيش معتاش
احدن يدور بالحياة البخاشيش
واحدن كريم و لا حسب حسبة الكاش
معليش يا بعض المخاليق معليش
طبع الاصايل غير عن طبع الاكداش
يالله يالمعبود مزنن مراهيش
تقلب سواد الحزن في وجهنا شاش
يا صاحبي وان جتك منا مطاريش
فيها جزيل الشعر مختوم بنقاش
رد الخبر بالله و علومكم ويش
ياهل الوفا والطيب يفداكم اللاش
نصبر على مر الصواديف حتيش
لو ضاق فيه الناس مدفون بالجاش
الوقت غاوي والهقاوي دراويش
«راس الظبي وان زان ما حوله اعراش»
الشعر معنى والمعاني لها ريش
ما صادها طيرن ولا طلق رشاش
انشد عليها ضاربين المهابيش
اللي لهم بالطيب مدهال و فراش
ربعن قروها ما عطوها تطانيش
هم تربة المعروف ما هم على ماش
ربعن صفاة البال لا جاه تشويش
سقاية الجزلات لو كانو اعطاش
عنز عليهم لا بلتك الدواويش
اللي لها بالجاش كن دق مهباش
واختامها يالله مزنن مراهيش
تقلب سواد الحزن ابيض من الشاش