لك بقلبي مكان ومنزله

ارقصي ماروح الليل توه باوله
تونا بالليل ماحان ميعاد الرحيل
طوحي بالشال كوني مثار الاسئله
لا يهمك من يغارون من طول الجديل
يا حياتي لك بقلبي مكان ومنزله
انتي اول من سكن خافقي مالك بديل
اسعدي من جا لشوفك وهو كله وله
منيته يا بنت شوفك ولو وقتٍ قليل
من يشوف عيونك السود فعلا تذهله
وينبهر من شاف شعرك على متنك يميل
بك جمالٍ ماذكر بالسنين الأوله
واجزم انه بآخر الوقت ما ياتي مثيل
الله اللي زاد حسنك بهاء وكمله
لطفك اللي صعب الاقيه بل هو مستحيل
في تبوك الورد عدوك مضرب أمثله
الجمال اخّاذ يا بنت والمعدن أصيل
لو يقولوا لك مثيلات هذي مهزله
صدقيني مالك امثال يا الظبي الجميل