سبب جرحي

طرالي وليفي يوم شعشع وبان النور
وليفي شبيه النور والنور من نوره
لياجت على بالي أحس بفخر وغرور
وهي تفتخر وتقول أنا فيك مغروره
انا اشهد شهادة حق ماهي شهادة زور
ماشفت من بين الصور مثلها صوره
وليفي يابو مازن يشابه بنات الحور
ولا فيه مثله بالغنادير غندوره
ابو غرة مثل القمر والشعر منثور
ذبحني هواه وعقبه الروح مخطوره
وليف سلب عقلي تركني بدون شعور
وعيني منه لو عافت النوم معذوره
جرحني وحبه هو سبب جرحي المخطور
احبه وهو للجرح طبه ودكتوره
انا حالف ما انساه مهما الزمان يدور
تحملت من شانه شقاء الوقت مع جوره
حياتي بشوفه كلبوها فرح وسرور
عسى الدار دوم بشوفة الزين معموره
ليا طب دار يصبح ترابها ممطور
وفيها الخزامى والنفل فاحت زهوره
يأمر وينهاني وانا المنهي المأمور
وانفذ له امره وامشي برايه وشوره
على شانه بيوت القصايد تجي بالدور
ولولاه ما اقرب غبة الشعر وبحوره
محمد سعد المغيري/ عفيف