معانق النور

الأمر لله يا هل العقل والشور
والصبر تاج وما على التاج عذروب
ومقسوم قلبك..لازم يعانق النور
يمسي جلي في حزّته دوم مطلوب
وانا غدا بي سيّد الريم بالبور
من عقب ما هي معانقه صارت اكروب
جاني..وقلبه يحتفي بضيق وكدور
جاني..بجوفه كله انقاض وحروب
قال..الوداع...وللقدر فعل مامور
تفتش صروف الوقت في عشقي ادروب
ارخى اللثام ومدّ لي عقد بلّور
عانق يدي وارخى الهدب حيل مصيوب
قال..الوداع ..وأنهر الهم والجور
خله حبيس بداخلك ذِكر رعبوب
هذا النصيب..وللشقا عمر ودهور
تطغى متونه فوق هامات وقلوب
قلت..الغلا..ماهو من الشوق معذور
انته..سنين العمر..والعمر محسوب