لقطة غليس

البارحة للنوم مالله هداني
تزاحمت عندي جميع الأحاسيس
في خاطري هم وقصيد ومعاني
وفي محجر عيوني دموع محابيس
فرحت بالدنيا وجتني تهاني
وحزنت فيها واتعبتني الهواجيس
عانيت بالدنيا ولازلت اعاني
الله يكافينا من الشر وابليس
والحمد للخالق على ماعطاني
لامن عطا يعطي بليا مقاييس
يارب تغفر زلتي وتحماني
من الظلال ومن عيون المناحيس
يارب جنبني دروب الهواني
جنبني دروب أهلها مفاليس
ناس تبيع الغالي بشي فاني
وتبدل دروب السهل بالتضاريس
اللي تعرض كل قاصي وداني
اللي معرفتهم مثل (لقطة غليس)
ناس تحسب المرجلة بالتماني
والكذب واللي يدور خلف الكواليس
وانا بعون الله بحفظ اتزاني
وأترك دروب أهل الوجيه المعابيس
وأمشي مع اللي فيهم الله كفاني
أهل الوفا وأهل الكرم والمحاميس
اللي معزتهم معزة اخواني
يسعون للعليا وكسب النواميس
الله على وقت مضى له زماني
تحتار في وصفه جميع القواميس
معهم حياتي طعمها طعم ثاني
تنام عيني ما تعرف الكوابيس
نبعد عن الازعاج وسط المباني
لديار ما تنشاف فيها القراطيس
وان صرت معهم طيبين المجاني
في روضة تطرق عليها النسانيس
بين النفل والشيح والقحوياني
ما نغبط اللي وسط لندن وباريس