نبع الشعر

اخطيت يا اللي كلمتك ما لها قيس
يا اللي تقول الشعر لأجل الوناسه
فشلت في رأيك بكل المقاييس
وخالفت للواقع براي الفلاسه
عن نفسك اكتب لين تملى القراطيس
وكلٍ على قده يفصّل لباسه
من يدفعه للشعر كثر الهواجيس
يفرق عن اللي فوق كرسي وماسه
وش لون يبرز والمشاعر محابيس
الشعر غيض وفيض نبعه وساسه
عذب الكلام بصادقات الأحاسيس
قولٍ مرتب ما يمر الدناسه
جزل من اللي يكسبون النواميس
وهزلٍ من أهل المهزله والبلاسه
لكن حظه صار تعبان وتعيس
وما عاد يعرف فضته من نحاسه
تطاولوه أهل الوجيه المفاليس
كلٍ يرشح صاحبه للرياسه
ويقول له فالشعر نهج ومجاليس
وعملاق في شعر الغزل والحماسه
أمدح وجامل لا خساره من الكيس
وبكره عليك الدور نفس السياسه
لو كان ما للوزن عنده مقاييس
والبيت مكسورٍ وفيه انتكاسه
ما همه ان الشعر مبدأ وتأسيس
أهم شيء الناس تسمع حساسه
ويذكر مع اللي يبعدون المراميس
ويطلع مثل غيره من الشعر راسه
ما شوقنه نادراتٍ التجانيس
بنات فكر اللي تجلى عماسه
شردٍ مواقعها مواكر قرانيس
تطلع ولو شدد عليها الحراسه
وهبه من الله دون منهج وتدريس
ما طوروها أهل اللغة والدراسه
في وقتها تارد حيامٍ كراديس
مثايل تحكم بفن وفراسه
تكود عرف مقلبين القواميس
طرادة الشهرة بعنف وشراسه
الشعر يرثى له من أهل المراويس
أنا أشهد انه حالته في تعاسه
محمد مذكر المغيبي العتيبي