منة الناس

يا هاجسي عطني من الشعر بقياس
ما بيك في بحر القصيد تغدي بي
احرجتني لو انت مبدع وحساس
واقول يوم احرجتني وش تبي بي
وانا مسافر والسفر يتعب الراس
واعيش بالدنيا سواة الغريبي
ودي من التسبيح.. والذكر نبراس
وعسى يصيرن كلهن من نصيبي
خص.. وانا بين الظهيره والادماس
زل الشباب وحان وقت المشيبي
لكن على شانك تناولت قرطاس
وكتبت قدام القمر لا يغيبي
ابيات للي عنده اشعور واحساس
اللي من اهداف النصيحه قريبي
وطي الجحيم.. اخير من منة الناس
ياواطي الجمره برجلك تطيبي
ومنة عباد الله تردك للافلاس
وترميك من راس الجبل للشعيبي
طعْني قبل لا ياقع الفاس بالراس
وان كان رايك غير تلقى طليبي
ردد مع الفنان واضرب بمرواس
يالا لا لا.. يا لا لا يا حبيبي
فهد هجاج الحربي /رياض الخبراء