إنجاز الهلال في عيون شعرائه

ما زالت القصائد تنهال على القسم الرياضي من انصار ومحبي الهلال والمنتمين لهذا الوطن الغالي,, ابتهاجا بفوز (الزعيم) ببطولة آسيا للاندية ابطال الدوري وها نحن نواصل نشر هذه القصائد تلبية لطلبات الهلاليين ورياضيي الوطن.
الوليد اللي مع الجود انذكر
البسي يا نجد من حلو الثياب
وارقصي الليلة إلى طلوع الفجر
وانثري شعرك على متن السحاب
واحضني هلالاً غدا الليلة قمر
وغطرفي له يالصحاري والشعاب
وقدمي له يالزهور أحلى عطر
ولحنوا العرضة وغنوا ياشباب
من خذا كاس المؤسس يفتخر
وهني اللي يدعمه وقت الصعاب
الوليد اللي مع الجود انذكر
الفريق اللي أنت عضوه ما يهاب
ما يخاف إنه يضيق وينعسر
سجل التاريخ نصره بالكتاب
يوم عشرة والشهر حادي عشر
أخت الهلال
الرياض
للهلال الفوز والمجد إلوطنّا
للهلال الفوز والمجد إلوطنّا
والوطن يا اهل الوطن فوق الجميع
نحمد الله جت على ما أحنا نتمنا
صارت الدنيا ربيع في ربيع
الزعيم اللي على القمة تثنا
جابها من خصم متمرس منيع
قالوا إرجاله ترى يا كاس حنا
بالمواقف لا نهاب ولا نطيع
بين أهلنا ما يضيع الكاس منا
لو تضيع أعمارنا هو ما يضيع
خصمنا لو هو يهدّف ما تهنّا
ردنا يا هو على اهدافه سريع
يا زمان المجد هذا هو زمنا
مسعدين الشيخ والطفل الرضيع
يفرح اللي لأجل شوفتنا تعنا
يوم غيره من فريقه مستريع
اسأل الملعب بيوم الحسم عنا
في شباك الخصم مضربنا وسيع
الحكم لا من بدينا العزف غنا
نفتن إرجال الصحافة والمذيع
ما سمعنا هرج مقهور تجنا
بارخص الاثمان حنا له نبيع
لو بخسنا حقنا غيره بخنا
كل منصف عارف فينا طليع
هذا الازرق يطرب الجمهور فنا
ما هو اللي للخصم حمل وديع
خالد حمدان سالم العنزي
عرعر
هلال البطولات
احصد بطولة يا هلال البطولات
ترى البطولة ما لها عنك بدّي
مشيك يالازرق في سما المجد بثبات
لو نحصي إنجازك فلا هي تعدّي
فريق تعود بصعود المنصات
ولا هو بالتمني والحكي وقول ودي
كم ملعب ينزل يضع فيه بصمات
وكم من فريق قابلة منه شدي
إذا هجم على الفرق الخصومات
لكنه الشيهان لا منه هدي
عودتنا يا هلال بضم البطولات
عودتنا في كل سنة بالتحدي
هل واكتمل في ذا السنة ثلاث مرات
والرابعة بأمر الولي لا تردي
لك كوكبة من النجوم المسمات
سامي ويوسف والدعيع يسدي
نواف والدوخي يشنون هجمات
وسيرجيو يترجمهن على كل ودي
واحمد خليل هو والشريدة وبالذات
وخميس لا شاف الذهب يستبدي
والشلهوب نجم ساطع ومبدع بالمهارات
وباقي النجوم لهم الشكر دون عدي
بندر يا وجه السعد والمهمات
خليت الأزرق دايمة مستعدي
عبدالرحمن عبدالله الحميدان