يا شارع الوشم انفض غبار الارهاب

وعش الحياة بعز وامن وسكينه
تبت يدين اللي غدر فيك حراب
والمجرم الخوان تبت يدينه
اشمخ براسك فوق باعزاز واعجاب
غصب عن اللي للهوى باع دينه
يا شلة الارهاب منهاجكم خاب
الدين وين وفعلكم عنه وينه
من عهد ابن ملجم تحدون الانياب
وعقولكم لابليس صارت رهينه
جهادكم قتل القرايب والاصحاب
وشعاركم شب الفتن خابرينه
قتل المره والطفل والشيخ والشاب
عاداتكم ياهل الغدر والضغينه
لكن بإذن الله وهو رب الارباب
حنا لكم ما تخرقون السفينه
ولو فتحتم باب نفتح مية باب
ومنهاجكم باقدامنا دايسينه
حتى ولو شكلتم لحربنا احزاب
نجتثكم والنذل فعله يدينه
ومن مات منكم مات ظالم وكذاب
والا ان حيا لا واحياة الغبينه
واللي يأيدكم فلا عنه مجناب
هو مثلكم بالجرم تشهد سنينه
ويارجال الامن انتم لنا درع وحجاب
بعد الله اللي من وثق به يعينه
أنتم أسود الدين عن كل مرتاب
وخسران من عادى الأسد في عرينه
تحمون دين الله عن كل طلاب
وتحمون بيته والنصر ضامنينه
أما حياة العز والأمن منساب
والا الشهاده واللواء رافعينه
وحنا ترى معكم على كل مرقاب
والليل معكم للوطن ساهرينه
ويا دولة التوحيد نرخص لك ارقاب
وقدرك بوسط قلوبنا حافظينه
منزلك وسط عيوننا تحت الاهداب
واللي يبي غدرك نبيح كنينه
ولا تحسبين لمن نوى يرهب حساب
مادام تحكمك الرجال الأمينه
فيك أبو فيصل حكم الشرع بكتاب
خادم حرم مكه وبيت المدينه
للشر صداد وللخير كساب
شهم بفعل الخير تندى يمينه
وراي ابو متعب منه صم الصفا ذاب
رجل المواقف والمواقف رزينه
وفيك الذي كفه للارواح معطاب
نايف يحفظك عن عدوك بعينه
يانايف اضرب كل مازان مضراب
وحنا الوطن بارواحنا مفتدينه
ماعاد ينفع لوم لايم ولاعتاب
ما ينفع الا السيف سله بحينه
اضرب بسيف الحق من فوق الاحداب
والسيف يجدي فوق جدوى الرطينه
ثم الصلاة عداد ما انهل سكاب
على نبي منهجه تابعينه
عطاالله بن سليمان العطاالله/الزلفي