أمي

قصيدة رثاء في والدتي نورة بنت عبدالعزيز الهبدان رحمة الله عليها
البارحه هليت دمعي من اقصاه
من زفرةٍ داخل حشاي محشوره
البيت ضاقت بي يا خالد زواياه
يا شين سقف البيت ويا شين سوره
امي ظلال البيت لا والله ضياه
وش ينبغى بالبيت من عقب نوره
قمت اتوجّد والحق الآه بالآه
والحزن في قلبي تهيض شعوره
اذكر زمانٍ راح واقول ويلاه
راحت سعد قلبي وراحت سروره
زول الحبيبه في عيوني حلاياه
اشوف زول امي على كل صوره
لا يا خلف قلبي ويا بلسم دواه
اللي حملتني وتعبت مع شهوره
بالبال هوجاسٍ طوتني سجاياه
الهاجس اللي في عيوني حضوره
اذكر طواري امي وفرشٍ فرشناه
في مجلس من ريحة امي بخوره
واليوم هاك الحس غاب وفقدناه
اليوم دفنّا امي في وسط محفوره
ياالله عساها في جنة الخلد يا الله
تقطف من الاثمار وتقطف زهوره
تفرش لها قصرٍ من المسك ماطاه
يالله عسى امي تهتني في قصوره
ختمت قاف الشعر واتممت معناه
ابيات شعرٍ من ضميري طهوره
وصلّوا على الهادي وخاتم نبياه
المصطفى اللي بأمته شاع نوره
الشاعر/ ماجد أحمد الثميري - المجمعة