فتنة حياتي

يالغايب الحاضر وسط قلب وعيون
لو غبت ما غاب الغلا يا غناتي
ليتك تجي وتشوف غيّبتك وشلون
وتشوف زولك بين ذاتي وذاتي
شفني بعد فرقاك من دون في دون
والحال يبراه الألم من سكاتي
في كل ليلة يسري الفكر بظنون
والعين عيّت تهتني بالمباتي
أصفق بكفي كل ما قالوا تهون
مالي جدا يا كود عض الشفاتي
أدري بأن الليّت ما فكّت سجون
ولا ردّت اللي راح عقب الفواتي
لكن أسج الرِجل وأزعج لك لحون
يمكن صدى الأصوات يجمع شتاتي
ويا غايبٍ عنه البشر ما يسدون
لو غبت ما غاب الغلا يا غناتي
وإن كان بين الناس فاتن ومفتون
أنا أعترف لك صرت فتنة حياتي