تدارك الوضع

قبل تصيبني حيره
واحتار واشره عليك وتقصر حبالي
وأضج من نوبة التفكير والغيره
واحط الأول من الضيقه على التالي
الوضع هذا حبيبي.. شوف لي غيره
ماني بتايه ولا غافل ولا سالي
تزعل كذا دون لا طاري ولا سيره
تقفي وانا الحق لي أزعل ولا أبالي
لولاي اقدّر حقوق الغير والجيره
إن كانت قلت الخطأ من سبة إهمالي
فوق الثرى من تَحَت سقف السما ديره
والناس حولي وكنّي بالخلا لحالي
والله يعلم بحالي حال تقصيره
عما أشتهيت وتمنيته من آمالي
اشوح وجهي ليا أهتميت واديره
واستقبل أفكار مدري كيف تنقالي
احيان خطرٍ يخون البال تعبيره
وأبدي على الناس ما يخطر على بالي
يا من تعذّر وصاله من معاذيره
منهلك عسرٍ وانا هدتني أحمالي
ذبلت على سلال شوقي ورد أزهايره
حسافة الورد.. ماهمتني سلالي
كمية الحب لو حبيت تصويره
بيقلص الكون في منظور عذالي
يعبث بي اللوم.. والمجهول تفسيره
يبعث على الضعف ويقلل من إقبالي
الوضع هذا إذا مرضاك تغييره
ف/ارضى على قد فعلك ردة أفعالي