قضى وقت اللقا فجأة وانا تايه بدون شعور اناظر عينك النجلا وصدري كثرت اسئلته ابي أسألك انا أشياء وحافظها هنا بالدوّر ولكنه ولا واحد من اللي حافظه قلته ترى والله مو طبعي.. ولكن يالغلا معذور ولا ظنه احد غيري تحمّل ما تحمّلته تحاكيني وانا سارح اناظر شعرك المنثور واقول الشعر جمّلها او انها هي مجمّلته؟ وعينٍ تسحر العالم ورمشٍ طاغيٍ مغرور سألتك بس قولي لي كذا وشلون عاملته؟ وثغرٍ يوه يا ساتر واسنانٍ كما البلور لأية مستوىٰ انتي ترى يا بنت واصلته؟ وحكيٍ ممتلي منطق وقعت بروعته مأسور لو اجلس يوم ما ملّت اذوني من مقابلته وانفاس الزهر هبّت تداعبني وانا مجبور أهمّل كل من حولي غصب مو طيب همّلته كذا طار اللقا مسرع بلا احمٍ ولا دستور او ان الوقت به علة ومدري ويش مشكلته ترى اصعب وضع للعاشق يبات من الوله مكسور لك التقدير يا ضلوعي عظيم الشوق شايلته تعالي نعيد لقيانا انا من داخلي مقهور لانه شي في نفسي حسافه ما بعد قلته
