عزانا في الفقيد

هذه قصيدة رثاء في الفقيد الغالي صاحب السمو الملكي الأمير/ فهد بن سلمان بن عبدالعزيز يرحمه الله
تعازينا لقايدنا الفهد في فهد بن سلمان
يا ابو فيصل ترى ما قدر الله لابن آدم جاه
رضينا ما يجي من ربنا ما قدر الله كان
وذي دبرة ولي العرش واللي دبره نرضاه
وتعازينا لعبدالله ولي العهد مع سلطان
تعازينا بأمير بالمكارم تطلقه يمناه
وتعازينا لكم يا ابو فهد يا ميرنا سلمان
عزانا في الفقيد اللي عسى الجنات هي ماواه
عسى ربي يعينك يلهمك بالصبر والسلوان
فهد لو طالت الايام ما تسلا ولا تنساه
تعازينا لعمانه وأشقانه أهل وأخوان
تعازينا لوالدته وزوجه وابنته وابناه
الا يا كبر حزن الشعب كله لوعة واحزان
بكوه الناس من حبه ومن يبكيه مالمناه
مالوم العين لو تبكي عليه الطيب الانسان
وذا خطب جلل والناس من كبر الحزن تنعاه
وهاذي سنة الله فالبشر من كانت الازمان
مقادير من الباري وما راده بنا سواه
خطفه الموت في سرعه وهاذي دبرة الرحمن
الا يالموت ممهلته ينفذ فكرته ومناه
توفى وهو تفكيره بفعل الخير والاحسان
يفكر في بنا مركز يعالج من يحس كلاه
امير بالوفا معروف تكفي سيرته برهان
على طول الزمن ما تنسى بين الملا ذكراه
سليل المجد لاهل المجد فيما قام به عنوان
وهذا غير مستغرب فابوه بمنهجه وصاه
عليه اقلامنا ترعف حزن ترثا رفيع الشان
عسى ربي يعوضه عن شبابه بالعفو يجزاه
الا ياقبر وسع فاللحد حتى يجي ميدان
الا ياقبر وسع للوفي في داخلك مثواه
عوضنا فيه من ربي واملنا فيك ياسلطان
املنا فيك يارجل الفضا الاول رعاك الله
وعلى خير البشر صلوا على الهادي نسل عدنان
عدد ما تنشي الانوا وما بنثر سحاب ماه
شعر/ عبدالله بن حمد بن سلمان السبر