إلا ما ندر

يابحر ما للهوى والحب ذمة
مثل موجك كل ما موجك هدر
كن قلبي في الهوى مهدور دمه
شال مع جرح الوفا جرح الغدر
طفل في روحي بكى من غيبة أمه
ما ضحك من قلبه إلا ما ندر
ما بقى من بعدها وردٍ يشمه
يختنق مع كل تنهيدة صدر
ما يطالع في النجوم ولا تهمه
فاقدٍ في الليلة الظلمى بدر
بس مع هذي صبر لو طال همه
ما ينزّل عزته مهما بدر
ما يقول إنه ملك في راس قمة
بس ما يخشى صعود المنحدر
ما يقف عمره على شتاتٍ يلمه
ويش قيمة فرحته لولا الكدر
من تصوّر ليلة فراقه مطمة
ليلة وصاله ما هي ليلة قدر
شاعر سعودي