أطراف لوح

غايب (ن) عني لك أكثر من شهر
وصاير (ن) يازين في وصلك شحوح
الرساله منك جتني في سطر
واتصالك غاب والصوت البحوح
بس ليتك سامع (ن) تقوى الهجر
ما تخليني كذا من غير روح
كني اللي غارق (ن) وسط البحر
ما لقى من يسعفه بأطراف لوح
ولو صحيح تحس فيني يا قمر
كان ماجتني من أسبابك جروح
ضايق (ن) صدري ولافيني صبر
بس قل لي في غيابك وين أروح
عايش (ن) بعدك حياتي في كدر
ما أطيق الضحك بعدك والمزوح
أكتم الأحزان عايش في قهر
واطلب وصالك وانا طبعي لحوح
ارحم المشتاق يا عين الصقر
يا شبيه البدر يالوجه السموح
تعرف انك وسط قلبي والنظر
شي واضح ما يبي أكثر وضوح
ليت يجمعنا مع الوقت القدر
دام أنا في رجعتك عندي طموح
ودامت الشكوى على الله والعذر
لا تخليني ولا عني تروح